Moda in onore de Sant’Antonio ‘e Padova

di Gavinu Còntene

 (Degheotto fioridu)

 Silanos chi ses tantu generosu  

ti prego sempr’a tie forte e sanu,  

Sant’Antoni giamadu Padoanu  

etat su mantu a dogn’isconsoladu;  

Padoanu Antoni Santu giamadu,  

ch’a dogni isconsoladu etat su mantu;  

Paduanu ses giamadu Antoni Santu,  

difende cun amore piedosu.  

De su tronu celeste maestosu  

domando su perdonu, si bi este;  

de su tronu maestosu celeste  

si bi este, domando su perdonu;  

de su celeste maestosu tronu  

perdonu a su mischinu peccadore.  

Silanos chi ses tantu generosu  

ti prego sempr’a tie forte e sanu,  

Sant’Antoni giamadu Padoanu  

etat su mantu a dogn’isconsoladu;   

Padoanu Antoni Santu giamadu,  

ch’a dogni isconsoladu eta su mantu;  

Paduanu ses giamadu Antoni Santu,  

difende piedosu cun amore  

Distrue de s’inferru su furore  

incue no mi ponzas in suterru;  

distrue su furore de s’inferru  

in suterru no mi ponzas incue;  

su furore de s’inferru distrue,  

si podes custa grazia a mie rende.  

Silanos chi ses tantu generosu  

ti prego sempr’a tie forte e sanu,  

Sant’Antoni giamadu Padoanu  

etat su mantu a dogn’isconsoladu;  

Padoanu Antoni Santu giamadu  

ch’a dogni isconsoladu eta su mantu;  

Paduanu ses giamadu Antoni Santu,  

cun amore piedosu difende.  

In pes imbenujadu ti so preghende,  

umiliadu de coro si mi crees;  

ti so preghende imbenujadu in pes,  

si mi crees de coro umiliadu;  

ti so preghende in pes imbenujadu,  

Antoni taumaturgu gloriosu.  

Silanos chi ses tantu generosu.

Silanus, 13 giugno 1908