Da pà me, la notti…

de Giuseppe Tirotto

Andà in macchina la notti, ninnaddu
in una néula di pagi, chena
pressa, chena appuntamenti, purtaddu
undi ti porta la currenti. S'alza
mittagnia una musica e ti piglia
cumenti caldu vinu d'una ampulla,
lu stradoni magèndula diventa
lu vellutu di la notti una tenta
schiariadda dugna tantu da li fari
chi t’arrìvini e pàssani
che certi pinsamenti, chissi impruisi
da triniggà lu sangu e la mimoria
affrisciadda in fulzeri d’emozioni,
da lu primmu lampizzà di l’occhji soi
a la stirazzadda dizisa ad una lenza,
da chiddu gol signaddu da luntanu
a lu dumani sarraddu i la manu
strinta in ghjru a li più rui banderi.

No vogliu pignì lu tempu andaddu,
ma sempri e undisisìa eu lu pensu,
cumenti l’ua lugenti d’istaddiali
candu lu vinu l’anima ti brusgia
i l’invirradda, ma li roddi sìghini
a ghjrà i la calma notti, ghjrani
li frecci chena pasu i lu rilogiu,
gràidda è la luna, e cà lu sa
si s’avarà a liarà in spiranza pà dumani.

1^ Classificata Sezione A Premio P. Mereu Tonara 2010