Su contu e su Nuraghe

de Peppe Montesu

Maestosu ti mustras e fieru
In supras de alturas collocadu
Dae tempos lontanos arrivadu
Vicinu a puttos sacros e funtanas
De raighinas a nois arcanas
No ischit nemos su chi fis abberu

As bidu de sos Sardos s’avventura
Inserrada la jucches in sas predas
Pares narenne enide non timidas
Ca bos conto e cust’isola su contu
De babbos vostros, ca deo so prontu,
Bos racconto sa manna disventura

Appo vidu sos balentes pastores
Sas innodas campagnas arburidas
Zente in berritta in ragas vestidas
In zippones groppettes e cambales
Femminas bellas fideles vestales
E de vheranos sos bellos primores

Appo vidu sos barbaros civiles
Secanne carres chin lamas de ferru
Umbe fit paradisu an fattu inferru
Ogni dulcura an distruttu e cessadu
Appo vidu su Sardu abbandonadu
Inserradu a sa sola in sos cuviles

Appo vidu su sardu sudore
infunnenne sas terras aradas
Apertas fin chin lughentes arvadas
Pro dare tricu senna a zente anzena
In mamas e isposas app’idu pena
In ojos insoro piantu e dolore

App’intesu de armentos su mellu
In nottes de istios isteddhadas
Appo vidu sas romanas armadas
A Amsicora leannili sa vida
De morte semenane s’arveschida
In cust’isola nostra senz’appellu

Appo vidu sa morte in siccos muros
De samben sardu ch’infustu a sa terra
De gioventude nostra morta in gherra
App’intesu s’attittu de sas mamas
Sas caras rudes intunnu a fiamas
De sos babbos barbudos cori duros

De onzi invasore appo in ammentu
Sos benes chi a nois an furadu
Da s’ispagnolu a su vandulu armadu
Intro sas predas appo iscrittu tottu
Chi a su munnu siat tottu notu
E non bolet che fozzas in su ventu

Eo so prontu si lu sezzis bois
Fizzos de sa Sardigna nostra amada
Fagher impare custa passizzada
Da su tempus passadu a su presente
Pro chi po tottus su tempus venente
Brillete s’aurora pur’a nois

maju 2014