Autonomia e sovranidade de sa Sardigna

de Giovanni Carta 

MODA

Isterrida

Maestosu e robustu su Nuraghe
simbulu ’e sa terra de Ichnusa
chi de fieresa possedit sa fonte.
Populu coraggiosu, pienu ’e paghe
chi cantat pro sa vida dulche musa
abbaidende serenu s’orizzonte.
Su dominiu coattu ’e su Piemonte
chi sa Casa Savoia inoghe hat fattu
fattende cessare dogni oghe
ch’est de sa libertade s’isterminiu.
De su Piemonte su coattu dominiu
chi sa Casa Savoia inoghe hat fattu
de su Piemonte su dominiu coattu
chi sa Casa Savoia hat fattu inoghe
fattende cessare dogni oghe
ch’est s’isterminiu de sa libertade.
Ma si opponen ai cuss’autoridade
In Casteddu, Oristanu e Nuòro.

Primu fiore

Su vicerè la debellat cun coro
e sa populatzione si ribellada
in-d-unu mare de confusione
sa flotta frantzesa ponet pè.

Cun coro la debellat su viceré
e sa populatzione si ribellada
su viceré cun coro la debellada
ca si ribellat sa populatzione
in-d-unu mare de confusione
ponet pè sa flotta frantzesa,
ma in Quartu Sant’Elena est sa resa
gratzie a s’esercitu Militzianu.

Segunda retroga

Maestosu e robustu su Nuraghe
…………………………………
in Casteddu, Nuòro e Oristanu.

Segundu fiore

Est in gherra tottu su Campidanu
su vintotto ’e Abrile cussa terra
e Giò Maria Angioy, cun istile
in Bono sa somossa hat post’in motu.
Est in gherra su Campidanu totu
su vintotto ’e Abrile cussa terra
totu su Campidanu est in gherra
cussa terra su vintotto ’e Abrile
e Giò Maria Angioy cun istile
in Bono hat post’in motu sa somossa.
“Procurade ’e moderare”, a sa riscossa!
de Frantziscu Ignatziu Mannu est su faeddu.

Ultima retroga

Maestosu e robustu su Nuraghe
……………………………….
In Nuoro, Oristanu e Casteddu.

Ultimu fiore

Sos feudatarios perdid’han s’aneddu
dae fronte a su popul’unidu
sos feudatarios s’anedd’han perdidu
a su populu unidu dae fronte.
E su Marchese, Barone e i su Conte
che lassana tottu sos tesoros
e sa bandiera de sos Battor Moros
enit in su Bastione innaltzada.
Mancari poi in sa sarda contrada
hana serradu sas “tancas a muru”,
e “su chelu haian serradu puru”
s’issu in sa terra fit istadu.
Ma “Sa Die ’e sa Sardigna” han dichiaradu
festa manna pro s’Isula e digna
m’han dichiaradu “Sa die ’e sa Sardigna”
pro s’Isula digna e festa manna.
Nurachi puru cantat un’osanna
pro sa rivolta iscritta in s’istoria
chi restet impressa in sa memoria
poi ’e tantos seculos ancora.
Torren a domo sos chi che sun fora,
suerende su pane in terra anzena,
a ue han tentu sa prim’esistentzia.
E sos chi vivene in custa dimora
onzi die chi la passen serena
cun tottu sos benes in possidentzia.
Zente cara de custa residentzia
bos saludo cun tantos riguardos,
bona notte e bona permanentzia
e viva sa Sardigna cun sos Sardos!

Nurachi, 12.03.2011