Sa cosa cheret... manizada

di Giovanni Fiori 

Su coro indeosadu abberu, iscàsciat(1)
chirchende chena pasu sa diosa.(2)
Issa l’apporrit sas laras de rosa
e issu puru de su ch’hat l’aggràsciat.(3)

Ma calchi ‘olta su... furru s’isfàsciat
e si nde morit chena... fagher cosa.
Tando bi cheret manu carignosa
a bider si sa... fache(4) torra s’àsciat...

Cudda acchicca(5) su fogu a mori-istuda...
Issu nd’’essit: “t’appago su disizu,
chi non ses morighende(6)... gioga(7) molta”.

E issa, asciutta-asciutta(8): “so in duda(9)
chi toccat de sighire su... manizu
pro non si... morrer un’àtera ‘olta!”

_______________________________
1. impazzisce.
2. la donna amata.
3. le concede, le fa grazia.
4. qui, la fiamma che arde nella bocca del forno.
5. attizza.
6. ravvivare, mestare.
7. lumaca.
8. modo di dire: con astuta indifferenza.
9. dubbio.