sabato 8 dicembre 2018

Aberide su coro de Antonio Piras



Aberide su coro
de Antonio Piras 

Lassadèlos sos odios, su rancore…
aberide su coro a s’amistade.

Istimadèbos totu, sorre e frade,
cun niunu ponzedas avolotu,
sorre e frade istimadèbos totu,
de custas rigas faghide tesoro.

Lassadèlos sos odios, su rancore…
a s’amistade aberide su coro.

Est s’amore chi mudat totu in oro
e chie no l’at cumpresu si nd’impudat,
est s’amore chi totu in oro mudat
cun sas operas bonas e sa fide.

Lassadèlos sos odios, su rancore…
a s’amistade su coro aberide.

E si bos an ofesu, cumpatide
comente dae Deus azis intesu,
e cumpatide si bos an ofesu
ca su perdonu bos faghet onore.

Aberide su coro a s’amistade,
lassadèlos sos odios, su rancore…

Azuade a sos chi sun in errore,
no lassedas a tzuf’in terr’a niunu,
azuade a sos ch’in errore sunu
pro ch’imparen sa via de s’onestade.

Aberide su coro a s’amistade,
su rancore, sos odios…los lassade.

In custa terra semper semenade
sinnos de paghe contr’a dogni gherra,
semper semenade in custa terra
bonas peraulas che in sos vangelos.

Aberide su coro a s’amistade,
su rancore, sos odios…lassadèlos.

A sos bentos dogn’ue isparghidèlos
custos umiles, sanos sentimentos
isparghidèlos dogn’ue a sos bentos:
torret in bonu custa umanidade!

Lassadèlos sos odios, su rancore…
aberide su coro a s’amistade!




Nessun commento:

Posta un commento