sabato 23 febbraio 2019

Ardaule de Giovanni Battista Deiana





Ardaulesa dimora nodida
Generosa e amabile comuna
Situada in s’amena montagna

De roca recinta est sa campagna
Distinta dae s’antiga epoca
Sa campagna recinta est de roca
Dae s’epoca antiga distinta
De roca sa campagna est recinta
Distinta dae s’epoc’antiga
De canales atzas tottu in riga
Est corazzada sa tua carena

Ardaulesa dimora nodida
Generosa e amabile comuna
Situada in sa montagna amena

Viticoltura e de fruttas prena
Musuleos e gruttas de bellura
Prena de fruttas e viticoltura
De bellura musuleos e gruttas
Prena de viticoltura e fruttas
Gruttas de bellura e musuleos
Nuraghe est unu a istados feos
Ca solu crachi perda oe b’ada

Ardaulesa dimora nodida
Generosa e amabile comuna
In s’amena montagna situada

In su artu e pianu collocada
Faticosu e medianu sartu
Collocada in su pianu artu
Sartu faticosu medianu
Collocada in su artu e pianu
Medianu sartu faticosu
Su litorale tu est favolosu
Cun su lagu Omodeo a mesu luna

Situada in s’amena montagna
Ardaulesa dimora nodida
Generosa e amabile comuna

Sa pellegrina locale fortuna
In pianura canale e collina
Sa locale fortuna pellegrina
In collina pianura e canale
Sa pellegrina fortuna locale
In canale collina e pianura
Zente laboriosa de bravura
Faen sa terra produttiva istabile

Situada in s’amena montagna
Ardaulesa dimora nodida
Comuna generosa e amabile

Su giudiziu est bastante abile
Cun sudore bundante sacrifiziu
Abile bastante est su giudiziu
Cun sacrifiziu e sudore bundante
Su giudiziu est abile bastante
Cun sacrifiziu e bundante sudore
Po massaiu artigianu e pastore
In Ardaule sa vida est penosa
Situada in s’amena montagna
Ardaulesa dimora nodida
Amabile comuna e generosa

Cortesa e gentile in dogni cosa
A sa civile s’invitu a sa mesa
In dogni cosa gentile e cortesa
A sa mesa s’invitu a sa civile
In dogni cosa cortesa e gentile
A sa civile sa mesa a s’invitu
E po s’amigu a dogni necessitu
Offrit su coro s’anima sa vida

Generosa e amabile comuna
Situada in s’amena montagna
Ardaulesa dimora nodida

Nidu chi m’as creadu sa naschida
A mamma babbu e parentad’unidu
Sa naschida chi m’as creadu nidu
Unidu babbu e mamma e parentadu
Nidu chi sa naschida m’as creadu
A parentad’unidu babbu e mamma
Una corona de laru e prama
Ti lasso memorabile in cust’ora

Generosa e amabile comuna
Situada in s’amena montagna
Ardaulesa nodida dimora

Su regalu chi ti fazo valora
De su chi ti nazo bonu o malu
Valora su chi ti fazo regalu
Malu o bonu de su chi ti nazo
Valora su regalu chi ti fazo
De su chi ti nazo malu o bonu
Gradi de coro custu meu donu
E perdona errores e offesa

Generosa e amabile comuna
Situada in s’amena montagna
Dimora nodida Ardaulesa

Puntu de tramontana e frischesa
In Funtana est Coronzu Pertuntu
De frischesa e tramontana puntu
Est Coronzu Pertuntu in Funtana
Puntu de frischesa e tramontana
In Funtana est Pertuntu Coronzu
Superbu seculare testimonzu
Non che ddu leat ne abba ne bentu
Custu Ardaulesu monumentu.

Ardaule, su 15 de Triulas de su 1985






Nessun commento:

Posta un commento