Dispedida de Giovanna Maria Lai Dettori

Dispedida de Giovanna Maria Lai Dettori

 

(de su cundennadu a morte)

 

Morfeo, non benzas ancora istanote,

a mi ninnare sa carena istasida.

Iseta.....

Custu est sero de ammentos

e intendo s'urulu 'e su 'entu,

chi carignat aidos de coro.

Ma est solu 'entu 'e rimpiantos

chi aunzat lagrimas de sale

e non apo sa giae pro abberrere giagas de consolu

e allughere isteddos de assentu.

Cantos isetos apo brujadu

isterrende alas de astore,

pro chircare in s'ispiju 'e sa vida

ispundas de fatzile istare.

Ma apo intessidu solu calancas de astrau

e mi bi so perdidu intro,

distruende aficos anzenos,

isfundende chizos de mama

e seghende incantos de isposa

cun raminzos de rantzigu dolu.

Gai m'apo giogadu sa menzus edade,

tramudende beranos de festa

in avrinas de niedda temporada.

E pro frutu de sa mala messera

apo incunzadu solu ispigas chena ranu,

chi ognora mi ferint sentidu.

Como poto solu chircare s'abbratzu 'e su Chelu,

cuende su piantu in s'aidu de sas dudas,

inue abbojant a fiotu mares de impudu.

Iseta....

Como benit issa,

sa segnora de nieddu ammuntada

chi non mudat mai sa 'estimenta,

e forte m'abbratzat,

a mie chi no apo connotu mancu bratzos de mama.

Ma de mama non tenet calore,

si t'istringhet non li torras carignu,

pro risu tenet sempre unu ghignu

chi ti 'elat su sambene in benas,

ti afiet cun sas cadenas

chi niunu at mai segadu,

e riet...riet...

L'iseto e la timo...

Deo, s'amigu fitianu in messeras de dolu.

E como cheret a mie!

E non mi restat mancu consolu de unu fiore o pregadoria

c'a niunu apo a mancare.

A passu lestru l'intendo como avantzare.....

Est già inoghe.

E m'imbreago de issa.

 

 

https://www.luigiladu.it/poesias/dispedida.htm