Mammas

de Gonario Carta Brocca

Pelea peleas andande
una terra an lassadu
sas mammas de s’ispera
po sizire unu sónniu
de pane e de luna
in sa terra prominta
innedda
dae cussos malos tronos
ue babbos e frades e maridos
non morzan
e sos pipios
unu risittu attattu
li pesen a su chelu.

Sas mammas de su coro
terras an acattadu
chi jagaran s’istranzu
chi s’istranzu accollozin
e iscufortu antigu e timorìa
tott'a palas si ‘ettan
cand’un’istilla ‘e mele
a isporados ómines istrinan
sas mammas de su mundu…
Mammas nieddas
mammas biancas:
sas mammas de s’ispìritu ‘e sa vida.

In carreras chi andan
in carreras chi ‘enin
sas mammas de sa terra
pelea peleas andande
unu sónniu de lughe ane servadu
e s’imortalidade intro su sinu
po dare visiones
po dare àttera cara
a su mundu ‘e sos ómines
inue tottu sas mamas
crescan a pane e luna
sos fizos de su cras.

Menzione d’Onore al 7° Premio di Poesia in Lingua Sarda Circoscrizioni n° 2 e n° 3 di Sassari