Crisi

de Giuseppe Tirotto 

Certu, emmu, vi so staddi dì
più bugghjosi di chisti, inverri
minacciosi a la ghjanna ed eva e notti
chi falavani innantu a casi
e carreri cumenti guttigghji
di pegi. O di meli, si mamma cusgia
e cuntava foli di piccinni boni
e mali pa’ ismintiggà
babbi luntani luntani
in cerca d’affichi, in cerca di pani…

Certu, emmu, vi so staddi dì
più ghjladdi di chisti, l’appusentu
scuntu e crudu, un brasgieri
appena a scaldì li piccinni ìmpiddi
nostri, e lu cori di mamma
chi cusgia cusgia pa’ sistacci
un dumani migliori. Si scaldia
chissu brasgieri e chissu cori! Puru
si la miseria razzulava, puru
si lu tronu cantava, e…

…E ci bastava lu fummu di un filu
i lu brasgieri, o la risa odorosa
di una bucchja di mandarinu
pa’ facci sunnià, pa’ facci bulà
achiddà li pultetti undi la notti
paria appiccà luni
a li bracci sfruniddi di li pèssigghi!

Invirraddi mali chissi, ma aiami
tempu e affichi da lampà i lu brasgieri,
avà emmu casi tecchji e caldi,
pultetti chi ammusciani lampi e troni,
eppuru ci assulta l’invirradda
di un dumani più poaru,
né più la notti appiccà luni
a li bracci sfruniddi di li pèssigghi…

2^ Classificata Premio Ittiri 2011