de Maria Sale
Sa pedra ch’est restada
in su trainu
est testimonza
muda
in segretesa.
S’est parada frimma,
non s’est resa
a sa pretesa
de andare...
Ted’esser in s’aficu
torra ‘e puntellare
ateros passos noòs
de babbu infritulidu
recuende in temporada.
Sa pedra ch’est restada
in su trainu,
s’ammentat su giampu
in pensamentos,
e-i s’andare cuntentos
de pitzinnos a maju
cun boghe ispantada.
Sa pedra ch’est restada
in su trainu
est granida e sicca,
iscolorida e trina
est falende a pedrighina,
est sola e assidigada.
Est pedra ismentigada
che-i s’abba ch’est passada:
inue isterria sa manu
e pianu
at istrejidu
sos primarios fiores
coloridos d’Eranu.
Nessun commento:
Posta un commento