Anneos.....

de Giovanni Piga 

Ite den esser
custas arpilias
chi sa carena mi sun pilisande,
in custa note ‘e pessamentos fertos?

Chi sian surdas mùghidas de bentu
lastimande pitzinnos innossentes
a supeddos de gana, isalenaos?
O istripitu ‘e alas
de libertades presas
chircande ‘e si fughire
dae sas francas malinnas
de mudesas fortzadas …?

Ballan isteddos frassos
in su sentìu meu trepojau
dae custa note-sùrbile irbenau...

In sa corte su cane est gannitande...
Ma non cumprendo dego
s’est ganninzu d’ispera... o de isporu.

So tremènde che foza...
Non resesso a ghelare sa resone...

Mi remuno sos pessos,
e sico sonni-sonnis,
chin su coro a tocheddu a tapulare
de sònnios e isperas,
de su cras sa pandera,
dae su bentu gurturju
irfilusada,
recamàndela ‘e pache e bona sorte
chin sentiu ‘e profeta...
pro sos Fizos!
Biadu chie s’acatat...
Biadu chie la biet
sa cara sana... noba ‘e s’aborinu...

2° classificato sezione verso sciolto - Premio di poesia “Tiu Finu” - Romana 17-08-2014