Guturos

de Agusto Piras

Gùturos ispinosos m’impedizant
de dare ‘essida a lìberos prenetos
mentres frundas d’isperas e isetos
in malos bentos truncant e trofizant,
ca sas friscas istiddas chi disizant
sicant in chentu laras de dispetos.

E da custos rualzos e fulcones
camineras d’’essida non nd’agato
ca paret chi si pudat su chi fato
imbiscadu in su ludu imbidiosu
de tantas limbas falzas chi su gosu
l’agatant solu in malas chistiones.

Tando mi frimmo fertu ma non mortu
a rimunire s’atza, in sos appeddos
de canes abbramidas e cateddos,
chi de nues m’ammuntant s’intrinada.
Su sàmbene m’apreto e cantu b’ada
pro rupire in s’iscuru pius tortu.

A totu paro fronte a tzufu reu,
cun sos ojos in fogu ‘e libertade
e cun sa limba paga piedade
nde mustro pro sos falzos pretzetores,
miserabiles giudas traitores
ch’in su male si buscant su recreu.

Si riunint che sos canes rundanos
ca sende solos fuint e sun viles.
Solu in trumas s’atrivint in cuiles
chi sena canes chilcant e pastores,
tatende sos istintos malfatores
sena arriscare cara e mancu manos.

Ma mudant chizu custos fariseos
si mustras debilesa o patimentu
e nudda ch’issos potant disizare.
Ti dant cussizos, bantidos, granzeos
ca sena s’oju puntu discuntentu
in tegus non nde podent agatare.

Las griso custas baddes arestadas
e bramo andare in campos semenados
inue creschent trigos tzapitados
cun s’araminzu sicu e boltuladu
e dogni ranu benit seberadu
pro lughere in sas colbes aupadas.

terza a biddanoa monteleone 2014