de Raffaele Piras
Candu s'odiu pillònat in sa menti
e su sanguni bùddit che in piangiàda,
no pòdit su sentidu essi crementi
ananti 'e una creatura apatigàda
ca in pressi s'atitìrigat su coru
po sa gana 'e torrai propria munèra
e no s'abràndat ne a sa prata o a s'oru
c'aintru ddu - i corròxinat sa fèra.
Ma pòdit sa vengantza allacanai?
Est su tempus chi fendi a s'arresìga
in pitùrra su solifàit brintrai
po chi aintru ddu - i cùmprat una spiga.
Su pani 'e cussu trigu cumossau
si pònit a stramai totu su velu
aundi su perdonu est inserrau
chi Deus imbiau s'hat de su celu.
Est dona chi si prènit de consolu
efàit torrai a nudda dogna neu,
amèlat sa pena de su dolu
e istèsiat de s'anima su spreu.
Nessun commento:
Posta un commento