di Giuseppe Tirotto
Bàddani a lu ritimo
di lu telecomandu ghjoggadori
ghjà di sònniu, chiddi chi t‘appintavi
a sforvigià da li giornali, chiddi
chi la notti dabboi mittiani l’ali…
Ma no era staddu sempri cussì,
primma mancu vi pinsava a la bòccia,
anzi, puru m’infaddava
si da li ghjogghi aduraddi mi sviava,
accò li cumpagneddi mei di tandu,
archi, frecci e cavadducci di canna
abbandunavani pa’ currì fattu
a chissa trampa tonda
chi mittagnia l’anima succhjulava
in bulei di zicchirri, piuari,
scalabraduri e diddi scuppuladdi.
E cussì m’annugiavu a figghjulalli
sbulazzà che trummadda
di struneddi a baginedda, candu
arricciani lu cielu in una rosa
chi s’abri e sarra
che pàlpiddu di cori innammuraddu,
solu cù li dispiageri, cun Blak,
Kinowa, Capitan Miki, l’Ercoli
e li Macisti di lu cinema,
appena Mastruguidu lu linzolu
li sirintini di festa apparicchjava
pianèndilu di sònnii e d’illusioni.
Accidenti a chiss’inventu
di palloni! Suspiravu i’l’ariggi
di Monti Ghjudiggi aresta, sottu,
drentu a la cava, i’lu campareddu,
sighia a rimbalzà la bòccia
cun buldeddu allegru e tristu silenziu
i’lu mè cori, accarizzendi
la spada isfainadda d’Ivanoe,
e cù l’occhji lu mari sbambarriaddu
di un azzurru chi più azzurru
no v’era, si no in certi
sudaddi maglietti, ma chistu assai,
assai più inghiddà i’ lu tempu…
3° Premio Poesia in verso sciolto “Santu Mauru” Sorgono 2014
Nessun commento:
Posta un commento