giovedì 20 febbraio 2020

Azudami de prussu de Leonardo Angelo Berria



Azudami de prussu
de Leonardo Angelo Berria      

Azudami Segnore,
azudami cuntinu,
azudami lu cherjo su cumprenner.
Ca m'has dadi lucore
Semper bonu caminu,
so peccadore e-a tive cherjo renner,
irballos e anneos,
atzettalos sos meos,
sa voche Tua achemila intenner,
ca so galu iscavadu,
vortzis a Tive non t'happo ascurtadu.

Torram'a immastrìre,
daemila sa manu,
ca ses Tue chi isperas galu donas.
E cherjo pissichìre,
su Tuo 'e veranu,
chi abbratzanne torra mi perdonas:
ses tzucaru amore,
ses mele 'e crarore,
sas càmpanas in coro mi-las sonas.
E cantu las intenno,
A cust'amore Tuo jà m'arrenno.

Carignami comente a prima vìa,
in cuddha Creja 'e Santa Maria,
inuve donzi Pasca chin Amore,
bramava sos Pretzettos oh Segnore.

Ca si non bi ses Tue b'isto male,
Tue Segnore su meu Nadale.

Leone sintzeru.

Nugoro, dechessette 'e Sant'Andrìa duamizza e seichi.



Nessun commento:

Posta un commento