Tottue apo chircadu
de te un'assimizu,
cun sa fortza 'e s'ammentu chi s'istiga
in coro m'at lassadu,
bogandeminde a pizu
tottu su chi m'as dadu, cando amiga
fis de sos tempos mios,
cando s'abba 'e sos rios
infundiat, in cussa muta antiga,
su pettus nudu meu,
faghìndemi connoscher su recreu.
E sigo a ti chircare,
mancari istraccu sia,
in sos zassos chi semper nos an bidu
paris a peleare
sa vida, in cussa 'ia
chi biu fit e forte su sentidu
ch'in coro mi naschiat
e m'accumpanzaiat
in cussu padru 'irde e fioridu,
ube lestros, currinde,
cuss'incras nostru fimis isterrinde.
Ma su tempus est ladru
e tottu ch'at cuadu
de cussa ispera tua e de sa mia;
de cussu amenu padru
mi ch'apo ismentigadu
sos nuscos, su colore e s'armonia.
Ma non poto olvidare
cussos ojos de mare
chi fin sa menzus prenda chi tenia.
E sigo a ti chircare,
fintzas ch'a cussu chelu ap'a pigare.
1°Premio alla IV Edizione del Concorso "Poetas in Orane" - 2011
Nessun commento:
Posta un commento