Bòlidus

de Rosanna Podda

Ita bòlidus eus fatu nosus
si pariat de arribai a celu
asub’e sanzianeddas
apicadas a su bentu.
Ita scimingiu tenemus nosus
lèbius, castiendisì
imbriagus di amori.
Ita passus impressìus
ponemus, currendi
a coru bogau
senz’e bì’ s’ora
de s’agatai a pari.
Ita amori mannu
eus lassau nosus
pinnichendi dònnia bisu
scarescendi basidus
e schirìngius di arrisu.
Pensendi, de depi donai contu
crèendi, chi no fessit cussa
sa parti a nosus destinàda
in su teatru falsu
de sa vida.
No at a essi’ stetiu…fortzis,
chi apu bolau a sola,
bisendimì a manu pigada
e acatendimì ancora indromiscàda
di essi’ fatu bòlidu’e babaiola.

1° Premio “ Mercede Mundula “ – F.I.D.A.P.A. Cagliari 2005