Manus nieddas

de Melis Katia Debora

A manus nieddas
e conca abasciàda
sezziu ananti de sa ziminera
serrendi i dentis
po si mussiai sa lingua,
tottu tremi tremi
cun is lambrigas inserradas in su coru.
Scit sa no podit, no deppit prangi,
ma est troppu forti sa timoria
de sa bregungia
(po una culpa chi no est sa sua).
Bregungia de no tenni prus unu traballu,
timoria de morr’ ‘e famini.
Pensat chi siat mellus morri e basta.
Morri prima, morri subitu.
Pustis sa boxi de unu pippieddu
chi currendi ddu zerriat “Babbu, babbu”
e is lambrigas si sciollint in su coru
e in sa cara.
Eccu dd’imprassat e ddu basat cun amori.
No. No est ora de morri
Custa.

Prima Classificata al 14° Premio di Poesia Città di Iglesias 2012