Su color’ ‘e s’ilgerru

de Antonello Bazzu

Chi siat ilgerru l’isco
dae sos ciclaminos
chi Lina assentat
in sa ventana a santandria.
Rien cando b’at sole,
nde buffan a si fèrrere
e a sero, istraccos, s’allizan
in bisos de isperas,
chei ch’aperen fattu s’amore.
Cando b’at bentu o frittu
abbàscian sa conca, unu pagu,
e isettan chi passet,
pasciensciles, ciarrende
cun sas fozas. Sun bellos
sos ciclaminos mios!
Sempre de unu colore sun ebbia:
su ruju, su colore
de s’ilgerru.

49^ Edizione “Premio Ozieri” di Letteratura Sarda
Sezione Poesia Sarda inedita “Antonio Sanna” anno 2007