Sera 'e 'ocos

de Salvatore Fancello

Ischintiddas e fumu in chelos trinos
e cuntzertos de campanas e brillios,
e lanas e amores in birbillios
imberghene che tazos in caminos.

Tott' intundu sa parta che una mandra
est festande su Santu sanadore
chi 'e sa carre frimadu hat su brujore
untande in sa carena sa malandra

Unu rosariu in manu po su pinzu
e un' ascruza 'e linna beneitta,
unu sinnu, unu 'asu a sa ruchitta
unu 'ocu balente in su trighinzu.

Dae s' aèra a fauzu travuntana
est falande chin froccos a sas tancas,
e bolana sas funes dae francas
po l'atzappare s' istella baiana

In ojos de pitzinnos cudd' incantu
chi trasparit durcuras isconnotas,
in coro de sos mannos milli lottas
anticas, de onores e de bantu.

A drinnos d'amistade e de amore
campaneddas caminan in sas ghias
iscapande superbas melodias
a su tempus de como, e benidore.

In sa cara festante, che isteddu
iscassan sas massiddas a su risu
e in laras buffande 'achen accisu
saniettes de biancu e de nieddu.

Dae su 'ocu ruiores de saurras
si perden in sa notte chin su frittu,
e fachen ghia tichirrios d' urgunittu
e boghes de tenores e de murras.

E cumpannias fachen sa nottada,
chin imbriacheras a sas tardas oras
a muinas e muttos e lilloras..............
Custa notte non drommit Mamuiada.!