Has’hapid’unu fizu, Mamoiada

de Antonio Maria Masia

(Moda, con versi rimati e incrociati –retrogados-, dedicata all’amico Peppinu Canneddu di Mamoiada, autore del libro, “Giovanni Piras – Juan Peron, due nomi una persona”. Una storia suggestiva e affascinante… anche se non fosse vera, come lui, invece, ritiene che sia)

Has hapid’unu fizu, Mamoiada,
intregad’in s’oru ‘e su misteriu,
niunu connoschet su destinu sou.

Dagh’una criadura ‘enit a nou
tres regulas de natura hat in sorte:
sa naschida, sa vida ei sa morte,
dagh’a nou ‘enit una criadura
hat in sorte tres regulas ‘e natura,
pro non faddire s’umanu caminu.

Has hapid’unu fizu, Mamoiada,
intregad’in s’oru ‘e su misteriu,
niunu connoschet su sou destinu.

Giuanne ^ nos lassat in coro pidinu
ca, chena morte, che passat lezeru,
e gai sas dudas imannan deabberu,
pidinu in coro Giuanne nos lassat
ca lezzeru, chena morte, che passat,
buffonende sas leges de ognunu.

Has hapid’unu fizu, Mamoiada,
intregad’in s’oru ‘e su misteriu,
su destinu sou connoschet niunu.

In bidda tottu aisettende sunu
s’istinchidda a su nodu trobojadu,
pro ischire sa sorte ite l’hat dadu,
Tottu aisettende sun’ in bidda
a su nodu trobojadu s’istinchidda.
Chi peset fogu e ispantu seriu!

Has hapid’unu fizu, Mamoiada,
niunu connoschet su destinu sou,
intregad’in s’oru ‘e su misterìu.

Naran chi fut de leones unu riu,
argentinu l’acclaman Presidente,
mere mannu de logos e de zente,
chi fut unu riu ‘e leones, narana,
argentinu Presidente l’acclamana.
Chena nudda partidu e chena loru!

Has hapid’unu fizu, Mamoiada,
niunu connoschet su destinu sou,
de su misteriu intregad’in s’oru

sa mama, in nieddu muccaloru
fin’a sa morte, piseddu, l’hat piantu,
preghend’ Antoni*, protettore Santu,
sa mama, in muccaloru nieddu
fin’a sa morte l’hat piantu, piseddu.
Sende chi fudi potente e cuadu!

Has hapid’unu fizu, Mamoiada,
niunu connoschet su destinu sou,
in s’oru ‘e su misteriu intregadu

e cando minore, a Peppinu°, hana nadu
chi su Fiore fut creschid’a consolu,
sa vida che l’han post’in oriolu,
e cand’a, Peppinu,l’han nadu, minore,
chi fut creschid’a consolu su Fiore,
a Giuanne l’hat luego dedicada.

Niunu connoschet su destinu sou,
intregad’in s’oru ‘e su misteriu,
has hapid’unu fizu, Mamoida.

Chi non podiat fagher sa torrada
proit’a nou, haiat giurad’ amore,
ch’iscuru l’est costadu, e dolore,
chi fagher sa torrada non podiat
proit’a nou, giurad’amor’ haiat,
cando “Juan” nd’est bessid’a pizu.

Niunu connoschet su destinu sou,
intregad’in s’oru ‘ e su misteriu,
Mamoida, has hapid’unu fizu.

Già l’isco ch’has mannu su disizu,
de nde ‘ogar’a s’affannu su velu.
Bi penset tando Anton’in su chelu. *
Già l’isco chi has disizu mannu,
de nde ‘ogare su vel’a s’affanu.
Bis’e contu, pro deris, e pro crasa!

Niunu connoschet su destinu sou,
intregad’in s’oru ‘e su misteriu,
unu fizu Mamoiada hapid’ hasa.

E cun Issu ispera e lughe dasa
a sos chena lumera e fortuna
pro ch’issos puru disizen sa luna.
Cun Issu lughe dasa e ispera
a sos chena fortuna e lumera
pro mores de cust’istoria fadada.

Has hapid’unu fizu Mamoiada



^ Giovanni Piras (o Juan Peron?)
*S.Antoni ‘e su fogu
°Peppinu Cannedu