In su sónniu m’apento

de Giovanni Piga

a una bachiana chi s’est fata monza…

M’as sinnau sas dies,
che istiu sos campos,
sicàndemi in pupias sos disizos.
Ma tue non t’abbies
mancu a lucore ‘e lampos
chi t’iseto che pàrpidu ‘e chizos
pro chi nessi unu pessu
dias alenu a custu coro arressu…

L’isco chi est dechiu,
pro disinnu divinu,
s’amore chi das tue pro impinnu.
Su meu, sumurtiu
non podet, miserinu,
de sa sorte mudare su dissinnu
d’una Froga ‘e chelu
innida boche in terra ‘e su Banzelu.

Su pessu meu in bolu
chin s’ispera in su chizu
si pesat in sa note che sisia
chircande su cossolu
pro s’ànima in disizu
de sa màzine tua ‘e biadia
chin sa corona in manu
precande amore pro su remitanu.

Petzi in sónniu m’apento
de ti bier ridende
chin su sole ballàndet’in pupias…
Ti pesso e mi cuntento
de ti bier tessende
randas de bida in mentes istasias…
Mi dat gosu… e dolore
su t’ischire in sa mente ‘e su Sennore…

Premio Speciale Poesia Tradizionale al 7° concorso di poesia in lingua sarda Circoscrizione n° 2 e 3 del comune di Sassari