Candu pasiat sa Musa

de Vincenzo Più

Sighit s’annada mala ‘e poesia
de sa canzoni mia trascurada,
annu po annu sa rima è bolada
e dogna versu parit consumiu-
che fundu sfruttuau impoberiu
po nd’air isfollau s’armonia.

Sa cobedina no cantat diciosa
e no crocolat cuba canterina-
ca mancat succi po una duina
e s’estru po su muttu spiritosu,
chi poniat ammaliu e gosu
sendi praxili satira briosa.

Istratallau m’anti s’allegria
lassendumì su coru axiau,
de su tempus ostili ’loriau -
prus a nixiunu ndi regalu prexu,
po sai lintu bisus de su strexu
cungendi a su sentidu fantasia.

Ta lastima però… no ddu creia!
immoi ca ndi fia assaborendi
delissia indorada pendipendi
in pertias- de drucciori carriadas,
nd’allogu is ainas ossidadas
ca tott’in d-una acabat sa maìa.

E po effettu finit sa binnenna-
manchendi calidadi in masseria,
sa prama nd’arretiru de sa ‘ia
ca no si gustat prusu in magasinu
sa battorina inciuppada ‘e binu
e de-i custu cantu serru s’enna.

Chissai chi torrit cuba arricchia
de poesia- pinta de ispera-
accucurendi versus de cudd’era
po cuntentai s’anima primada-
de dogna passioni ‘sbuidada
ca de espertus- no fut preferia.

Ammiru sa giuria- competenti
ca in s’ammassu scerat poesia,
troppu modesta resultat sa mia
mancari coloria a bortas parit
no podit essi prima si no balit
ca bincit su poeta prus valenti.

Occannu parit beni incaminada
po binnennai musa de talentu -
nd’acciunju a sa cuba su framentu
de poetica moda arretrogada,
mentris abetu su giustu momentu
po nd’iscuppai cantu de annada;
chissai chi torreus a delissiai
mutettus cun su sonu de cantai.

Premio di segnalazione al "Premiu 'e Poesia Sarda Santu Mauru" Sorgono - 2013