Un’ispera in manos

de Gian Gavino Vasco

Pagu durat sa lughe,
e pagu su calore
chi sa carena carpit e cunfortat.
Lestra torrat sa rughe,
torrat s’iscurigore
e donzi gosu in pena si ch’isbortat.
E chie t’accunortat,
o s’ànimu t’illèbiat,
cumbattinde una gherra
ube niunu in terra
su frittu ti che catzat e t’intèbiat?
E su tempus isettas
de dies torra lùghidas e nettas.

E donz’ora, onz’istante,
supportas sos fastizos,
ca ischis chi su sole at a torrare
po su tempus bastante
a t’assuttare in chizos
làmbrigas isvanéssidas in mare,
po t’intender in nare
sos nuscos de sa vida
trazados da’ su ‘entu,
in sabor’ ‘e s’ammentu
de s’edade da ora consumida,
in su coro pintada,
a custu tempus rànchidu furada.

Colan lentas sas dies
cando suffris s’inserru
intr’ ‘e muros pesados da’ su fadu,
e custrintu ti bies,
in su frittu ‘e s’ilgerru,
a chircare cheghentu in su passadu,
in su fogu istudadu,
inube sa chisina
mandat su tebiore
de cuss’antigu amore
ch’ancora ti carignat, che sa frina
de dìligos beranos,
un’ispera istringhìndedi in sas manos.

1° Premio alla IX Edizione del Premio di Poesia "Poete Jorzi Pinna" – Pozzomaggiore 25 agosto 2013