Sedattende sa vida

de Salvatore Ladu

A chelu asulu, in cussorza froria
Mi godo su riposu meritadu
Imbriagu d'incanta 'e su criadu
A nuscu 'e armidda e frores d'iscraria.

Sedattande 'e sa vida s'incunzau
In arzolas de ispiga ingranida
Abbrazzette cun tegus una vida
Conto sos panes chi mas'agonzau.

Poi ‘e su sacradu giuramentu
E de promissas fattasa in s'altare
Dies de luna prena e unu mare
De intimos affranzos in caentu.

Promissas chi hana alluttu che fiamma
Su coro, ca in ojos has pintadu
Unu nidu caente e ricamadu
Uè deo so babbu e tue mamma.

Car'a bidda a sola in su montriccu
Cun su libru 'e sa vida a pidruccare
Cantu m'has dadu a oje e m'hasa dare
Est in fozzos lughende che ispriccu.

Ca prenu est de rispostasa appagadas.
Da cando mi ses faru e ses reina
De domo, e si ti at puntu calch ispina
Lavras caentes ti las at basadas.

Cun sos pilos biancos che su nie
Ricamu in coa e su risittu in laras
Cantu tenzo in disizzu mi preparas
Cun tant'amore che sa prima die.

Sunu tottus prò tene e tind'abbizzas
Sos disizzos galanos chi appo in coro
Pedi puru impuddiles tintos d'oro
Pedimi cantu bramas e disizzas.

Unu chelu d'isteddos, unu mare
Pedimi tottu, ma non benzat mancu
Su disizzu de m'aere a fìancu
Cun su respiru mi des cantare.

Primo Premio al Concorso di Poesia “Quartucciu 2008“