Incanidu

de Giuseppe Delogu

Incanidu
de disingannos e peleas
so torradu a "Cuccureteti",
ub'estasiadu
una borta
tra iscrareas in frore
a su munnu
pro prim' ap' apertu
sos ocros pizzinnos
sutta duas lunas
ch'iscìan luchentes
dae su mar' 'e Durgali.

Pérdidu
in gutturinos e carreras
tra muros biaittos
de zimentu
chirco de badas
sas erbeches paschenne
de ziu "Balentinu"
e mudrecos e prunazzas
ub'annidaban
gardulitteddas e prantaitthas
a su settatthar' 'e sor grillos
de s'istadiale.

S'intrighinada
mi còllit
in "arjola-cudinattha"
gal'urminanne
imprentas irbiadidas
de sa pizzinnìa mea
passizzera.

E a su lenu drinnire
de campanas serenas
intr'unu bolu lastimosu
de pìchidas corrancas
a nobu mi battizzo
in-d-un'abbasanteri
de làgrimas cubadas
lamentanne
sor dannos de su tempus
ei sas ingannìas
de s'amment' aularju
e de s'olvidu.