Versos

de Gonario Carta Brocca

Irfattu est su sero
sa lantia mortura
e zeo
unu versu so chircande...
su versu mai iscrittu
immortale
su versu de su bene e de su male!
Ma fortzis...
su bene chin su male
sone solu s'imbentu
d'antigos benduleris de paràulas.

Unu versu so chircande
de iscrier in sa pira de su pane
in coro 'e sos amigos
in manzanos de sentidos
in cara de sa vida e de sa morte.
Unu versu che leppa
po truncare sos lovros de sa notte
cand' ómines mantenet presoneris.
Sos versos de eris
sos versos de crasa
po fraicare carreras de poesia.
Versos de chidériu...
versos animosos
versos imbriagos d'illusione
chi 'olen in s'aera
a inchèndere isteddos de ispera.

Versos
mancari a frighinitas
che carignos dae corvos pittulados
versos bramados
chi sas janas cantadu nos aian.
Versos che campanas in festa
po istrajare lampizos
de astros ierriles chi amuinan
chin tùnchios canudos d'astraore.

Intreverau de versos
che a mimi chen'asore e chene 'oghe
colo 'alu sas nottes semenande
versigheddos de sole.

3° Premio ex aequo al Biennale di Poesia “A pes de Santu Padre” 2011 di Bortigali