Tempus…

de Giovanni Chessa

Sazat sas paulatas
a punta de bachiddu
d’istiddas d’abba frita ch’est niada,
sonende cun rebatas
nde prenat su casiddu
ch’iscovecat currèndelu in falada,
onzi nue minetat
chi s’astrore bi ghetat
in s’arvatada terra semenada,
lughende s’ammummutat
cando in sinu lampizat e burbutat.

De s’abba si sustentat
s’allentorada erva
rupida in manzaniles de avrore,
s’acarat e s’abentat
cussa pomposa cherva
chi nuscat dae bentos tebiore,
bi mùidat funtana
de laras est in gana
chi zovanos la basent che fiore,
in carreras piseddos
zoghende contant lùghidos isteddos.

B’allentat trigu in tula
e s’arridore pasat
gumprende pustis pane chi sustentat.
B’abbarrat petzi istula,
onzi puzone rasat,
calende subra a ranu si b’istentat.
Ma s’ómine b’ilghenzat
chi bellesa mantenzat,
apitzat frammas, brujat e trummentat.
Bi mudat burrutones
in frutale e in binza pupujones.

Trabojant cussos bentos
ch’imbolighende isfaghent
nueras in moddinas fritorosas.
Unu bisu in ammentos
d’ànimas chi cunfaghent
intre làgrimas bràmidas de rosas.
Clchi sulcu s’abberit
umbe sèmene ferit
e isperas nadias siant posas.
E s’ómine est ligadu
a pesa e rue… rutu e arritzadu…

2° Premio Poesie in Rima - Premio Biennale di Poesia in Lingua Sarda “A pes de Santu Padre” - Bortigali 2013