martedì 23 settembre 2014

Amiga tristura


de Antonello Bazzu 

Addae, inue sas bramas
leant su sestu ‘e sas nues,
fia chérfidu ‘istare
cand’a manu tenta mi leas
amiga tristura,
cumpanza ‘e s’amargura.

Làssami ‘e sei, a reu t’incaresco,
làssa chi si m’attattet
s’anima e s’ùmprant
ojos e coro ‘e su gosu chi dant
sas cosas chi sos sàbios
li nàrana bellesa e libertade…

Ma tue, surda e muda,
sighis s’andanta tua,
si m’abbratzas astrintu
…e de mi lassare ‘istare
non nde cheres s’intesa!

E deo…iscur’a mie!
Comente ap’a pòder deo,
si mai b’ap’a resèssere,
a che giagarare
sa prus cara
de sas pagas amantes mias!?

Menzione d’onore nella Sezione B Poesia in verso sciolto - “Premiu ‘e poesia sarda Santu Mauru” Sorgono 2014


Nessun commento:

Posta un commento