de Dante Erriu
A bertuledda prena seu andendu
fàcias ancà mi portat su destinu
e sigu curiosu in su camminu
inter is luxis craras
chi portant a su padru prenu ’e froris.
Su frius de s’ierru mi carìnniat
e m’annìnniat su bentu mui mui
chi mi treulat totu su sentidu.
Su soli est ixelendi
e s’umbra allonghiendi
ma oramai sa pratza tengu prena
de fruta, cantu ia disigiau.
S’atra parti mia est a su costau
e impari andaus
arregodendu totu su beranu
e totu is istracìas…
chi sa peddi a nos at ingrussau.
Cantu eus cumossau
e scravigau in s’argiola nosta!
Eus fatu promissa
de lassai sa mesa apariciàda
e beni ingiriàda de is prendas
chi su tempus, sinzillu, s’at donau.
1° premiu setzioni poesia “Anselmo Spiga” Santu Sparau
Nessun commento:
Posta un commento