Su relogiu de su campanili

de Giovanni Bellisai

Su relogiu de su campanili
Est firmu a is dexi e cincu
No sciu de cali annu e cali dì.
Forzis su propriu de su coru miu
Firmu abettendi chi torrist tui.

Perou su campanili, a sonus de campana,
Battit is oras e mandat is notizias
De vida o de morti.
Su coru miu invecis batti pagu
O troppu e chene fai rumoriu
Ca, de airi e ias, no bolit propriu
Intendi, i’ sonus benendi.

Totu est cirtiu cun sa morti in coru
E nemus passendi si firmat a pregai.
Nemus scit de sa morti mia,
De unu coru chi no bivit prus..
Andau s’amori in ateras airis,
Andau su bentu chi pispisàt
Fueddus de amori, immoi is lagrimas
Parint stiddius de su tempus malu
Chi est in arribu. Sonat sa campana
De su campanili.. De tronus
E lampus hap’essiri in cumpangia.

Ceraxus, 01.10.2011

3° premio Logudoro-Ozieri 2013 sezione S. Bertulu tema libero rima e verso sciolto