S'aspru

de Augusto Piras

Rampos arestes puntudos d’ispinas
in faltzas bestes de tantos colores
s’ondrant de druches nuscos e fiores
cuende sas intragnas assassinas.

Faltzos ispijos de bramas d’amore,
de padentes fozidos d’assulenu,
in s’olvidu de dogni male anzenu
ammuntant de sa vida ogni brujore.

Ladros si furant su risu innotzente
chi s’isperdet in fumos e pruìnes,
in giogos arriscados e machines
chi su corpus degogliant e sa mente.

Ma dogni fogu cando s’erba mancat
morit tudende fumos e lampizos;
brotat su fadu malu ‘e tantos fizos,
e su sole in sas nues si che tancat

In sas baddes froridas calat nue
sichende dogni istidda de suore
e sa vida non tenet prus sabore
cun istradas serradas in totue.

Solu in sas rocas si podet pigare
in mesu ‘e sas ispinas de tiria
atacados a una fune ebbia
chi caligunu at crefidu calare.

Chie s’arriscat che podet torrare
in paradisos birdes de isperas
lassende in palas sas tristas anderas,
torrende a nascher, torrende a campare.

Prima classificata al concorso della quanrtina di Meana Sardo - 2014