Ischintiddas de ispantu

de Vittorio Sella

Columberis che nidos vacantes
in pinna ‘e muros de granitu
cumparin brivos de ispicas e granos.
Ampullas in colore virde,
boitas, assentatas a pira pare
lampizan intro unu corrale astrintu.
E téulas a bìculos, imprueratas,
suspitas de abba e de ventu,
s'annaghen ispartinatas in sa corte.

De custa frita sorte
ispèrio s’ormina ‘e sa mùtria,
cumpanza de sa luche ‘e su sole
chi eris tinghiat de ispera
sa janna como frischiata
in custa domo de ventanas tuppatas.

Ma primitia una ménnula in fiore
e unu batente ‘e linna aoratu
aperin paris calassos de istòrias,
ghettan ischintiddas de ispantu,
de tempus chi torrat presente
in custa domo. E contat
de passos sicuros,
de manos sapientes e lestras
chi donaian carignos e istima.

Fit tanno in s’oru ‘e sa janna
chi cupaiat lenu lenu in sa carena
s'istracchiore operosu ‘e sa die.
E sa cuntentesa naschiat in cussa domo
pro s’ ora durche ‘e su pasu serale.

Menzione d’Onore al Concorso di Poesia in Lingua Sarda della 2ª e 3ª Circoscrizione di Sassari - 2013