Buscìchi di sabòni

de Angela Costanzo

Bòzi ruffiàna ghi aisètti dùgna nòtti notte
a fà di la zurràda mèa li cònti
e ipàgli i lu zaibèddu li prinètti
e tasthavèddi màcchi immintigàdi.

Li pinsamènti antìgghi e curriòri
s'acciàrani da zèntu e più cuzzòri
liàdi a un fìru ghi mai si trònca
si pèsani burèndi che la zònca*.

Tùttu di nùdda, misciàddu e ingrugliuràdu
pìglia la vìnza innàntu a la rasgiòni
cumènti e fòri ischrìtti i lu pabìru,
fàzzi carìgni e sièndi di cutòni.

Pòi nùdda, ranziggòri gàndu ridòzu zòcca
a manzanìri càggi dùgna illusiòni macca.

Vi sò zicchìrri e pienti, di gà nò vò pisà
prufùmmu bònu in càsa di làtti e di caffè,
v'è sòru una cundànna, bisògna trabaglià.

Crèsci la vìda e impàrani pizòni a burà
tra sacrifìzi e fàuri si sìghi a trampistà,
acchì la fantasìa, nò abbàstha a fà campà.

Ma sìghi dùgna nòtti ancòra a iffurrùgià
chìssa ruffiàna bòzi ghi v'è drèntu,
sarà di la cussènzia macchìni o gà lu sà
ma càndu tàncu l'òcci, eu làssu, làssu andà.

Più curriòra bòru, nò sìgu la rasgiòni
m'assùsthu, piègnu o m'allègru
mi piènu d'illusiòni,
mancàrri a manzanìri... buscìcchi di sabòni!

_____________________

*zònca= assiolo.

Primo Premio nel concorso indetto dal Circolo Culturale Culleziu di Sassari - 2009